ශ්‍රී ලංකාවේ කෘෂිකර්මාන්තයට ඉංජිනේරුමය දැනුම හා ප්‍රවේශයක් ලබා දීම අරමුණු කර ගනිමින් මධ්‍යම ඉංජිනේරු උපදේශණ කාර්යාංශය හා ශ්‍රි ලංකා හදබිම අධිකාරිය එක්ව 2023 වර්ෂයේ ආරම්භ කරන ලද නවතම ව්‍යාපෘතිය මේ වන විට අදියර කිහිපයක් යටතේ නිම කරමින් පවති. මෙම කටයුතු නිරීක්ෂණය සඳහා 2023.08. 04 දින ගරු කෘෂිකර්ම අමාත්‍ය මහින්ද අමරවීර මැතිතුමන් සහභාගි වූ අතර මෙම අවස්‌ථාවට ශ්‍රී ලංකා හදබිම අධිකාරියේ ගරු සභාපතිතුමන්, විධායක අධ්‍යක්ෂකතුමිය, නියෝජ්‍ය අධ්‍යක්ෂක, කෘෂිකාර්ම සංවර්ධන නිළධාරීන්, පල්ලෙකැලේ ගොවිපළ කළමනාකරු සංජීව කරුණාරත්න මහතා සහ අතිරේක ගොවිපළ කලමණාකාරු පසන්ද සිල්වා මහතා ඇතුළු කාර්ය මණ්ඩලය සහභාගි විය.
ඒ අනුව ශ්‍රී ලංකා හදබිම අධිකාරිය සතුව පවතින පල්ලෙකැලේ ගොවිපළ සංවර්ධනය සඳහා සපයාගැනීමට නොහැකිව තිබූ මූලික ප්‍රාග්ධනය රජයේ කිසිඳු වියදමකින් තොරව තවත් රාජ්‍ය ආයතනයක් වන මධ්‍යම ඉංජිනේරු උපදේශණ කාර්යාංශය සමඟ එක්ව ගොවිපළ සංවර්ධන ඉලක්ක කරා යොමු කරලිමට මේ වන විට අවස්ථාව උදා වෙමින් පවතියි.
මේ වන විට පල්ලෙකැලේ ගොවිපළෙහි මූලික වශයෙන් දැනට පවතින බිත්තර නිෂ්පාදනය සහ කුකුළු පැටවුන් නිෂ්පාදනය ඉහළ නැංවීම අරමුණු කර ගනිමින් නිෂ්පාදන ධාරිතාව ඉහළ නැංවීමට අවශ්‍ය කුකුළු නිවාස ඉදිවෙමින් පවතින අතර ගොවිපළෙහි කාබනික එළවළු පළතුරු නිෂ්පාදනය ඉහළ නැංවීම සඳහා ආරක්ෂිත ගෘහ ඉදිවෙමින් පවතින අතර ඉතා කෙටි කාලයක් තුල අත් කරගෙන ඇති ප්‍රගතිය පිළිබඳව මෙහිදී ගරු අමාත්‍යතුමන්ගේ නිරීක්ෂණයට ලක්විය.
ශ්‍රී ලංකා හදබිම අධිකාරියේ ගරු සභාපති සරත් චන්ද්‍රසිරි විතාන මහතාගේ අදහසකට අනුව ක්‍රියාත්මක කෙරෙන මෙම ව්‍යාපෘතිය එතුමාගේ පූර්ණ මඟපෙන්වීම යටතේ විධායක අධ්‍යක්ෂක කුමුදු කරුණාරත්න මහත්මියගේ අධීක්ෂණය මෙන්ම නියෝජ්‍ය අධ්‍යක්ෂක කණිෂ්ක කහපොළ මහතාගේ මෙහෙයවීම යටතේ ගොවිපළ කලමණාකාරු සහ අතිරේක ගොවිපළ කලමණාකරුගේද සහයෝගයෙන් සිදුකෙරෙන අතර සියලු ඉදිකිරීම් කටයුතු සහ මූලික පිරිවැය මධ්‍යම ඉංජිනේරු උපදේශණ කාර්යාංශය මඟින් දරනු ලබයි.
